哈巴狗赤兔（下）-中国宠物网

来源：弄堂

作者：胡宝谈

讲述：吴越狂

审阅、推荐：丁迪蒙

编辑：王乙其

往期回顾：哈巴狗赤兔（上）

哈巴狗赤兔（下） 音频：进度条 00:00 04:19 后退15秒倍速快进15秒

阿庆儿子又教赤兔抢车位。每日天落班辰光，阿庆嫂手拍拍，赤兔邪气通人性，马上蹿到弄堂里头睏好，拿门口停助动车个地方占脱。阿庆儿子勿转来，啥人也覅想轧一脚。勿识相，狗汪汪汪一叫，比副科想升正科朋友只头还尖个牙子啀发啀发，总归叫人有眼抖豁。想勿到过脱两日天，又勿对头了，车位日日拨小菜场卖野山参个东北人占脱。阿庆嫂一打听，又是麦阿姨问人家讨去一包人参叶子泡茶，讲啥保险解决车位问题。麦阿姨一样老花头，一碗摆勒着着高个红烧肉。搿记阿庆嫂勿响先，勿是闷脱，要做辣货酱足眼个事体拨对头嗒嗒。

后头两日，里委会选小组长，麦阿姨面皮倒是老，硬做主张，拿肖照贴勒候选人一栏里向。照牌头，肖照个钞票呒没付，讲啥当仔小组长会得多关照关照开照相馆个小江西。早浪头买小菜转来，啥路道？弄堂里个人看见伊，两只面孔侪蛮贼腔个？候选人一栏前头，介许多人啥体筑勒一道？勿用伊轧，大家马上让条人弄堂拨伊进去。

赤兔对牢伊个肖照横叫竖叫，脚爪扑上去恨性命攋仔横一记竖一记，弄得只面孔一条条，阿三讲搿个叫星条旗，美国总统个卖相。“看看看，搿种能个人好选伊伐，连得狗对伊也有意见唻！”“侬讲啥人！”麦阿姨三角眼瞪得三角倒过来。阿庆嫂节头管、衣裳管浪个灰弹弹脱，望肖照浪一指。“啥人末自家看呀！啥体勿望别人肖照浪攋，就是要攋搿张肖照？”

边浪交关平常日脚勿敢发声音个朋友，今朝一有人带头马上开电喇叭。“今朝算是碰着赤兔爷叔唻！”“勿是碰着赤兔，叫伊碰着赤佬唻！”“人勒做，天勒看。天公公看勿过去，派三只眼条神仙狗下来脱伊校路子，晓得伐？”连下来怪闲话多来，讲狗是弄堂里啥人啥人，死勒文化大革命风头浪，乃朝改革开放浪头浪又转来哉。麦阿姨要发格又发勿出，狗攋伊肖照，做梦也朆做着，也做勿出搿排事体呀，人告狗斗去，又加鸭屎臭，看伊笑话个人又加有讲头来。

搿记冷夯头只好吃进，气潽潽转去。到底哪能桩事体呢？有人讲，阿庆嫂半夜里迓迓叫起来，拿红烧肉个肉滷刮勒麦阿姨肖照个背后头。有人讲，是橄榄出个好主意，做是阿庆儿子去做个。还有人讲，麦家爷叔大义灭亲，麦阿姨勒弄堂里穷凶霸道，作兴到辰光啥人勿投伊票，伊要告人家硬上，揿头割耳朵揿牢人家选伊，真拨伊选上去个说话，勿是害人嘛。

麦阿姨呢，一口咬定是狗中邪，勿是伊碰着赤佬，是狗碰着赤佬。

——————————————————

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。